Беларускай партыі левых "Справядлівы свет" 30 год!

Дарагія сябры!

Прэзідыум Беларускай сацыял-дэмакратычнай партыі (Грамада) віншуе Беларускую партыю левых “Справядлівы свет” з 30-годдзем з дня заснавання.

Беларуская партыя левых “Справядлівы свет” з’яўляецца адной з нешматлікіх апазіцыйных партый Беларусі, якая здолела выжыць у складаных унутрыпалітычных умовах і дэманструе сваю прынцыповую пазіцыю.

“Справядлівы свет” мае доўгую і цікавую гісторыю. Мы, сацыял-дэмакарты, не забываем, што ля вытокаў камуністычнага руху ў Беларусі стаялі і радыкальна настроеныя сябры Беларускай Сацыялістычнай Грамады, якія падзялялі сацыяльную платформу бальшавікоў, але справу сацыяльнага вызвалення сялянства і рабочых увязвалі са справай нацыянальнага самавызначэння беларускага народа, што цалкам адпавядала поглядам Фрыдрыха  Энгельса, які пісаў, што “ліквідацыя нацыянальнага ўціску з’яўляецца асноўнай умовай усякага здаровага і свабоднага развіцця”, што “інтэрнацыянальны рух пралетарыяту наагул магчымы толькі ў асяроддзі самастойных нацый”.

У часы дэмакратычных пераўтварэнняў Партыя камуністаў Беларуская выступіла супраць аўтарытарнай палітыкі Аляксандра Лукашэнкі. У 2009 г. ПКБ прыняла новую назву – Беларуская партыя левых “Справядлівы свет” і прадоўжыла змаганне за палітычны плюралізм, за эканамічныя і сацыяльныя правы грамадзян.

Менавіта адстойванне палітычнага плюралізму і барацьба за грамадзянскія, эканамічныя і сацыяльныя правы чалавека збліжаюць нашы партыі.

За часы незалежнасці Беларуская сацыял-дэмакратычная партыя (Грамада) разам з Беларускай партыяй левых “Справядлівы свет” удзельнічала ў стварэнні і працы розных кааліцый — такіх як “5+”, “Сямёрка”, “Саюз левых партый” і “Аб’яднаныя дэмакратычныя сілы”. Абедзве партыі актыўна ўдзельнічалі ў праграме беларуска-шведскага супрацоўніцтва “Паглыблены дыялог” і працавалі над праектамі рэформаў дзеля дэмакратызацыі Беларусі, сумесна арганізоўвалі працу першага і другога Сацыяльных форумаў, якія выпрацоўвалі агульны парадак дня левых палітычных арганізацый Беларусі.

10 верасня 2020 г. Беларуская партыя левых “Справядлівы свет” разам з БСДП і іншымі васьмю палітычнымі партыямі Беларусі падпісала агульную рэзалюцыю аб спыненні гвалту, пачатку дыялогу і правядзенні новых прэзідэнцкіх выбараў.

Беларуская партыя левых “Справядлівы свет” неаднаразова паказвала, што з’яўляецца надзейным партнёрам, валодае добрым арганізацыйным патэнцыялам і выканаўчай дысцыплінай, і гэтыя якасці даюць надзею на далейшае плённае супрацоўніцтва паміж нашымі арганізацыямі.

Прэзідыум БСДП у гэтую святочную дату жадае сябрам Беларускай партыі левых “Справядлівы свет” далейшай плённай працы, імклівага арганізацыйнага развіцця, прадстаўніцтва ў парламенце, мясцовых Саветах і органах выканаўчай улады дзеля таго, каб наша краіна стала сапраўды сацыяльна арыентаванай дзяржавай.

Прынята Прэзідыум БСДП “30” лістапада 2021 г.